Mi hausaten retheihna an vei ; India mi hausate zinga ṭanpuina lama inhmangte

India ram hi khawvela ei leh bara ram ṭhang chak berte zinga mi a nih rualin mi rethei tamna berte zinga mi a ni bawk. Chutihlai mek chuan billionaire leh millionaire pawh tam tak a kawl. Heng mi hausa tawntawte hian mi retheite an vei hle a, ṭanpuina tur leh, mi retheiten hma an sawn a, ramin hma a sawn theihna turin pawisa fai pawh an thehchhuak nasa hle.

India mi hausa zinga ṭanpuina lama inhmang nasa, hriat hlawh chu Info Edge dintu leh an exe­cutive vice chairman, naukri.com ti­chhuaktute zinga mi, kum 53 mi Sanjeev Bikhchandani a ni. Ani hian a bikin zirna in a ngai pawimawh a, “Puitlinga mihring min siamtu zirna hmunte hi kan pe let ve tur a ni” tih ngaihdan nei tlattu a ni. Rualbanlo ngaihsak kawngah leh, cancer natna tuar naupangte enkawlna lamah pawh sum a thawh nasa hle a, tun thlenga ṭanpuina lama sum a thawh tawh zawng zawng hi USD mtd 15 zet a tling tawh.

Essel Group-a an chairman, Subhash Chandra hi mi inphal berte zinga mi a ni ngei ang. Ekal Global kaltlang ringawtin hian cheng maktaduai tam tak a pe chhuak tawh. Sarthi a din a, hemi hmang hian khua leh tuite leh sorkar inzawmna ṭha tak a siam a, Ekal Global kal­tlang hian tribal naupang, India rama thingtlang khua 55,000-a mite naupang maktaduai 1.4 te hnenah a thlawnin zirna a siamsak. Kum khata a sum lakluh zawng zawng zaa 10 hi ṭanpuina lama hmanna turin a dah hrang tawp ṭhin.

Mahindra Group-a an chairman, Anand Mahindra pawh hi sum leh paia midangte ṭanpuina atana che chhuak nasa a ni. Kum kaltate khan Anand hian USD maktaduai tam tak sum a thehchhuak tawh a, a ngaih pawimawh ṭhin chu hmei­chhiaten zirna an neih theih nan te, mi tam takin tui thianghlim in tur an neih theih leh, tribal-ten lo an neihna kawngah te a ṭanpui nasa hle. Kum 2010 chhung ringawt pawh khan Mahindra Humanities Centre din nan Harvard-ah USD mtd 10 a pe. Forbes-in India mi, ṭanpuina lama mi thil phal a tar chhuah zingah hian Arvind-a an chairman leh Managing director Sanjay Lalbhai te, Oriental Cuisines chairman Muthalampet Mahadevan te, Surat Diamond Jewellery managing director Rajiv Mehta te pawh an lang.