Kendall-i’n KUWTK kalsanin NY a pan

Keeping Up With The Kardashian show hian a vawrtawp a thleng tawh a, tlak­hniam lam a pan chho mek niin a lang. Kim Kardashian-i’n pawisa tam zawk a ngiat a, Kylie Jenner-i’n an chhungkaw show a tuipui tawh loh thu a sawi hnuah Kendall Jenner chuan an chhungkaw show kalsanin New York lam a pan dawn.

Kendall Jenner hian a eizawnna lama hlawhtlin lehzual tumin an chhungkaw show kalpui mek, hlawhtling leh entu ngah tak ṭhin chu a kalsan dawn a, he show-a tel zel hi a tum ta chiah lo. Kendall hian New York a pan ang a, hetah hian model ropui lehzual nih tumin hna a thawk dawn.

New York hi modelling industry-ah chuan US tana hmun pawimawh a ni. New York aṭang hian Europe-a kai theihna chance a sang tawh a, US-a model lar leh hlawhtling tak takte pawh he khuaah hian an cheng a, Kendall ṭhian ṭha eng emaw zat an cheng bawk, chung zingah chuan Gigi Hadid pawh a tel. Kendall hian a in luah tur lo thlithlai turte pawhin mi a ruai fel vek tawh niin an sawi.