Rebecca St. James EP thar July 24-ah

Grammy award bakah Gospel music huangchhunga chawimawina ngaihhlut Dove Award pawh eng emaw zat lo dawng tawh Rebecca St. James chuan July 24 hian a EP thar 'Dawn' chu a tlangzarh dawn.

Christian artist zinga huhang ngah tak ṭhin Rebecca St. James hi a reh rei tawh hle a, kum kua lai record a tihchhuah tawh loh hnuah hla paruk awmna tur a EP thar hi tlangzarh a tum thu hi a rawn puang chhuak leh ta a ni.

"Tun ang hunah hi chuan Worship hi ka tana music ṭha ber niin ka hria a, ka nihna nen a inmil hle a, ka bulṭanna tak tak pawh a ni. Ka EP thar tur innghahna hi 'dawn'(kawl ṭan tirh)- ni chhuak thar, bulṭanna thar a ni. A theme chu Pathian min tlanna a ni ber a, natna dam hnua hlimna hun inṭanna leh beiseina a ni bawk," tiin a EP thar tur chungchang hi a sawi.

'Dawn' hi a lo thawhpui fo tawh ṭhin Tedd T. leh Seth Mosley-te chuan an produce dawn a, a nuṭa  For KING & COUNTRY member Luke Smallbone bakah Bethel Music-a mi Josh Baldwin leh Brandon Lake-te a thawhpui bawk.

Rebecca St. James hi khawthlang lam Gospel music ngaihthla ṭhin chuan an hre fur awm e,  Australian Christian pop rock singer a ni a, kum 43 lai ni ve tawhin studio album pakua lai a tlangzarh tawh a ni. Grammy pakhat a dawn tawh bakah  GMA Dove Award pathum lai a dawng tawh a ni.