John Kenty leh SKorean boxer inhnek tur ṭhulh

K&P Entertainment-in buatsaih a tum, Boxing Exhibition match, 'Ring of Glory' John Kenty leh South Korean boxer ṭha Kyeongseop Lee inhnek tur, August 26-a R. Dengṭhuama Indoor Stadium-a neih tur chu tun hnaia MIZBA thuchhuak vangin an ṭhulh.

MIZBA chuan an organization hriatpui ni lo event reng renga MIZBA hnuaia Boxer-te tel a phal tak loh avangin, inbuatsaihna kalpui tawh zawng zawng tawp sanin he Exhibition match pawh hi ṭhulh a ni ta a ni. He event-ah hian John Kenty vs Lee te bakah Mizo boxer ṭhahnem tak leh state pawn boxer-te inhnek tura ruahman a ni a, heng match zawng zawng pawh hi cancel nghal a ni.

John Kenty vs Lee-te hi Exhibition match a nih rualin, midang zawng hi Professional Match tura tih a ni a, hei hi K&P Promotions leh LPS Promotions-te License hnuaia hmalak a ni. K&P Entertainment hian, hmanni lawk khan Professional Boxing event hlawhtling tak, 'Clash of the Stars' a lo huaihawt tawh a, G'nie leh Papuia-te bakah Mizo Boxer ṭha tak tak leh state pawn boxer-te an lo inlan tawh bawk.

Kings & Prophets Entertainment chuan, event cancel a ngai ta hi pawi a ti takzet tih tarlangin, nghakhlel taka lo changtu mipuite hnenah hriatthiamna a dil thu an sawi.