Chester Bennington thih aṭangin kum 3 a liam ta

Khawvelin kum zabi thar, millenium a kai chhoh rual khan rimawi khawvel pawhin rahbi thar a kai a, chu rahbi thar zingah chuan Linkin Park pawh hi an tel ngei alawm. Chu Alternative rock rap metal band thar chuan an music genre hmangin rimawi khawvel an al hneh a, khawvel hmun hrang hrangah an rimawi chu an sukpui dual dual a ni ber mai. Chutiang taka mite rilru hnehtu band-a an zaitupa ber, pa cher ria ve deuh, lu zuah buk em em ngai lo, scream thei zet mai leh zaithiam zet mai, Arizona lam mi Chester Bennington chuan nun hrehawm tak aṭangin nun nuam zawk a rawn zawh chho ve mek tih mi tam tak chuan a hunlai khan an hre si lo.

Nun awhawm lo zawhtu Chester!    

Ni e, mite chuan khawvela band hlawhtling bera an zaitupa ber, duh duh nei thei leh nawmna tinreng chenah an ngai ngei ang. Hun rei lote chhung chu a dik mai thei e, mahse a rawn chawr chhuahna khawvel erawh mi tam berin kan thlan loh tur a ni thung si.

Kum sarih mi lek a nih laiin kum lama upa zawk mipa dangin a pawngsual a, tuai nih a hlauh luatah a sawi chhuak ngam lo a, kum 13 a tlin thlengin pawngsual hi a tawk ta fo mai si a; a tawpah a pa bula a sawi chhuah hnuah he a saltanna aṭang hian a tal chhuak ta chauh a ni. Chumai a la ni lo, kum 11 lek a nihin a nu leh pa an inṭhena, hei hian a nunah nghawng a nei lian lutuka, kum naupangtein ruihhlo lamah a tlan phah. 

Heng a rilru hahna lak aṭanga tlanchhiatna atan hian lem a ziah ṭhin bakah poetry leh hlate a phuah ṭhin a ni. In lamah leh a mimal nunah harsatna a tawh nasat tawh tehlul nen school lamah hmuhsit a tawk bawk a, a cher avang ringawta nuihsawhtu lah bo lo. Rimawi lam a luhchilh hma hian Burger King-ahte a inhlawh ve lawp lawp ṭhin a ni.

Hun harsa tak karah a dam khawchhuahna tur a sual chhuak a, khawvel hriat khawpin a hming chher mah se, depression a neih ṭhin lakbosak tur erawh chuan chu chu a tawk zo si lo. Interview ṭhenkhatah depression a neih dan leh a sual chhuah dante pawh sawi fo mah se a lo la hneh tak tak reng reng lo.

Kum 2017, May 18 a lo inher chhuah chuan a ṭhian ṭha tak, Audiosalave vocalist Chris Cornell chu a inawkhlum a, chu chu Chester hian a tuar zo lo ni berin mi tam takin an ngai. Instagram lamah pawh Cornell tel loa khawvel hmachhawn chu a ngaihtuah thiam lo zawk tih a sawi hial. July 20, Chris Cornell pian champha kum 53-na a lo herchhuah meuh chuan rimawi khawvela eng mawi tak chhuah ṭhin Chester Benington chu chhem mihin a awm ta a ni. A inawhhlum chhan tak sawi thei awm lo mah se Cornell pianchamah tak a inawkhlum hian mi tam tak ngaihtuah a tithui hle.

Mike Shinoda leh Ed White-te hla phuah 'One More Light' hi Chester nun nen a inhmeh zui hle nghe nghe a, a thih hma ni 13 la awma Birmingham-a show an neiha a sak ṭum phei chuan ngaihbel tur tingin a sa lungrun zual hlein a fan-te chuan an hria. Mi ṭhenkhat phei chuan a fan-te a mangṭhana niin an ngai.   

Chester-a nupui Talinda Bennington chuan September 2017 khan Twitter-ah second 40 leka thui video a post a, he video hi a pasal thih hma darkar 36 la awma lak a ni. Video-ah hian Chester chu a la hlim hle a, a chhung khatte nen an la nui tlang bawk bawk a ni. He video a post hma hian Talinda chuan a tweet tur chu a 'personal' hle tih leh depression-in lan dan leh mood a neih loh thu a sawi hmasa a ni.