Japanese actor Haruma Miura a thi

Japanese actor Haruma Miura, kan nula lam chuan 'Hiro' tia an hriat lar chu Inrinni khan  Minato, Tokyo-a a chenna inah a inawkhlum.

Haruma Miura hi a hnaa kal tur a ni a, mahse a kal tak si loah chuan a manager a chenna inah a chhan zawt turin a kal chuan a inawkhlum hi a va hmu ta a ni. Rang takin damdawi-in panpui nghal a nih hnuah a thih thu hi puan a ni ta a ni.

Miura hi Japanese lem­chan thiam zingah chuan hriat hlawh ber pawl a ni a, lemchan a thiam piah lamah hian a zai thiam bawk. Kum 1997 khan TV drama Agri-ah a inlan ṭan tawh a, mahse a lar chhuah tak takna erawh kum 2007-a tlangzarh Japanese romance film Koizora (Sky of Love) kha a ni a, he film-ah hian Hiro lemah changin khatih hunlai khan Mizo ṭhalaite pawhin he film hi an lawm hle a nih kha.

Film hit tak tak a chang hnem hman hle a, chung zingah chuan Mizo ṭhalai, mipa lamin an lawm em em Crows Zero 2 pawh kha a tel. Tokyo Anime Award-a  Animation of the Year hial pawh dawng tawh Attack on Titans live action film-a siamah pawh khan a changtupa Eren Yeager lemah a chang a, he film pawh hi critics lamin lawm vak lo mah se Japanese box office lamah chuan a che ṭha hle.