TBC Zaithanpuia A hla phuah ngei lo châng rawh le

TBCA-a hla thar hi ‘Min ngaidam rawh’ tih hla a ni a, kum 2015-a a phuah chhuah tawh kha a ni a, kum hnih hnuah music video-in a siam chauh a ni. TBCA chuan, “He hla hi Tlangval pakhat ka hriat ngai pawh ni loin, a nun min share-na aṭanga lo inirhchhuak a ni. Mitin mai hian, he hringnun kan hman mekah hian, Pathian hmaah leh kan mihringpuite hmaah thil tih sual tam tak - a lian emaw, a tê deuh emaw, kan nei fo ṭhin a, chuvang chuan, Pathian leh kan mihringpuite ngaihdamna ngai lo tumah reng reng kan lo awm lo a ni. Chumi anih avang chuan ka tan pawh he hla hi ka ṭawng-ṭaina hla a lo ni reng mai,” a ti.

Hla a phuah chhuahna a ṭha a, a satu TBCA hi a thiam mai bakah a video pawh hmuh a nuamin, ni buai si loin a changkang hle. Music video hi Andrew Ralte kutchhuak a ni a, recording hi Blue Wave Records-a a tih a ni. Musician-ah hian Ephraim, Muanpuia leh Ruata Royte te a hmang a, music video-ah hian Danny Murray leh Esther Chhakchhuak te chu model-a a hman a ni. Drone video hi Danny Murray kutchhuak a ni bawk.

Ama hla phuah ngei music video a tichhuak thei dawn ta hi TBCA a lawm hle. “He music video a puitlinna tura mi inphal leh min puitu zawng zawng chungah ka lawm tak zet a ni. He video hi Pathian ropui nan chauh lo nise tih hi ka ṭawngṭaina a ni,” a ti.

‘Min ngaidam rawh’ tih hla hi TBCA tan kumina a music video pahnihna a ni. Kum tir lam khan ‘Zawh ka zuam lo’ music video a lo tichhuak tawh a, Ṭhazual chart lamah pawh he hla hmangin hian pakhatna a luah. Kuminah vek ‘Nang chauh i ni’ hla hmangin pakhatna vawi hnih a lo luah tawh bawk.