PURPLE HEARTS: Sofia Carson leh director Elizabeth Allen Rosenbaum-te'n eng nge an sawi?

Tunlaia ṭhalaite'n an lawm em em, Netflix film hit chho mek 'Purple Hearts' hi i lo en ve tawh em? I lo la en lo a nih pawhin social media lamah tal chuan tute emaw status/story-ah emaw chuan i hmuh tawh ngei a rinawm e.

Achangtunu Sofia Carson leh director-producer Elizabeth Allen Rosenbaum-te hi kum nga vel liam ta, 'Pretty Little Liars: Perfectionists' aṭang khan an inhre tawh a, an innel nghal viau. Rosenbaum chuan a ṭhian producer-te hnenah chuan Carson a thawhpui theihna tur script ngaihtuah nghal turin a ngen a, chumi aṭanga kar hnih hnu lekah chuan 'Purple Hearts' script chu a nei nghal der mai a ni.

Kum 5 liam ta khan Purple Hearts script hi an nei tawh
Rosenbaum chuan Portland-a a thelnna hotel room-ah chhiar nghalin, a tirah chuan mipa zawk thlirna aṭanga ziah a ni a, mahse 'update' hlek a ngaiin a hre ta a. Carson nen chuan chuta ṭang chuan thawkdun nghalin Carson-i hlate zehtel dan turte pawh an ngaihtuah nghal. Chumi aṭang chuan Carson pawh chu a vawi khatna atan executive producer a ni nghal ta der mai.

"Tunah chuan producer bug ka nei ve ta," tiin Variety hnenah sawiin,"Hetiang hawi zawnga kawng tinrenga thawnthu sawinaa ka tel ve thei hi nuam ka ti hle," tiin a sawi zui bawk. Chutichuan Luke tur zawn a hun ta.

Carson chuan,"Liz nen hian kum nga zet chu he film atan leh Cassie leh Luke tur chu tunge tiin duhthu kan sam tawh. Movie en tura ka kal apiangin kan movie chu ka rilruah a awm ziah," tia sawiin,"A changtu tur kan zawn tak tak hnua Nick [Galitzine] ka tawn chiah khan, kan chemistry avangin amah chu Luke tur a ni tih ka hre nghal," a ti hial.

Scene hmasa tawite tur an chhiar zawh hnuh chuan producer Elysa Koplovitz Dutton chuan,"Eng nge thleng ka hre bik lo, mahse, kha movie kha ka en dawn chiang," tiin a ṭawng chhuak hial bawk.

Rosenbaum chuan a tirah tak chuan Luke lema chang turin Nickolas Galitzine chu a 'yes' nghal mai lo tih a sawi a, Nick chu a 'sweet' mah mah a tih thu leh tlema rorum ve deuh a duh thu a sawi. Mahse Carson-i'n a sawi ngun em avangin Nick chu a kawm chiang ta a, chumi hnuah chuan a duhthu a sam ta a ni.

A tira ruahmanna an siam dan takah chuan Cassie leh Luke thawnthu chu 'Purple Hearts'-a tawp mai turin an hisap a, mahse, an tlangzarh aṭanga kar hnih chhung lekah darkar maktaduai 100 chuang en a nih tak hnuah chuan a chhunzawmna siamte pawh an rilruk deuh niawm tak a ni. Carson chuan,"Tunah chuan fan lam aṭangin a chhunzawmna tur beiseina a awm a, fan theory leh spin-off thlengin an sawi," tiin Variety hnenah a sawi a, eng nge thleng zel tur hriat a chak ve tho thu sawi bawkin, Rosenbaum nen pawh a chhunzawmna chungchang an sawi tihte pawh a sawi chhuak hial. Official erawh chuan engmah thutlukna an la siam lo.