'I Know What You Did Last Summer' star Anne Heche a thi

Lemchanthiam Anne Heche chu Pathianni khan Los Angeles, California, U.S-ah kum 53 mi niin a thi.

Anne Heche chuanna car hi August 5 khan West Los Angeles-ah chesualin a car chuanna aṭanga hnuh chhuah a nih hmain a kang nasa hman hle a, damdawi-in panpui a nih hnu lawk aṭangin a hriatna a hloh nghal a ni. Chuti chung chuan rei tak enkawl chhunzawm a ni a, Zirtawpni liam ta khan California state danah phei chuan thia puan a ni tawh nachungin 'life support' erawh an la pe reng a, mahse Pathianni khan 'life support' pawh chu an phawi ta a ni.

Anne Heche hian lemchan lamah sulhnu a hnutchhiah ṭha hle a, 'I Know What You Did Last Summer', 'Donnie Brasco', 'Psycho', leh 'Wag the Dog'-ahte pawh khan changin film 43 vel a chang hman a, tunah hian a channa hnuhnung ber 'Supercell' chu tlangzarh a la ni lo bawk. TV show eng emaw zatah inlan tawh bawkin a lemchanthiam vang hian award pawh a dawng nual hman a ni.