Manuna’n ‘Duhaisam’ hmun a thleng

Hard Ray aṭanga Zoram khawvelin kan hriat lar Manuna chuan duh­aisam hmun a thleng a, Hontrade Ṭhazual Lengzem chart tih­chhuah thar berah ‘Duhaisam’ hla hmangin pakhatna a luah.

Manuna hla ‘Duh­aisam’ hi May 29 aṭang khan chart-ah hian kan hmu ṭan a, 10-naah bul a rawn ṭan. June thlaa chart tihchhuah hmasak berah palina a kai der a, a hnuah pathumna a thleng chho a, pahnihna kal kânin, pakhatnaah a rawn lawn chhuak ta a ni. Mizo rapper fam ta, Michael M. Sailo kal lai a rawn nek chhuah theih dan aṭang hian a neu lo hle tihna a ni.

Manuna hla, pakhatna luah thei ‘Duhaisam’ hi ama mimal hminga music video a siam ni mah se, he video-ah pawh hian Hard Ray band kutchhuak kan la hmu zel. Music vel leh recording te pawh hi Hard Ray band a thawhpui ṭhinte khan an la pui vek a, mimalin, ama hmingin kal mah se, a lungphum chu Hard Ray bawk kha a la ni kan ti thei ang.

Michael M. Sailo hla ‘Thinlai Hnemtu’ chu pakhatna a luah hnuah pahnihnaah a chhuk thla a, Zorinzuali Khiangte feat 135 hla ‘Ka ngaidam che’ tih chu pathumna a rawn thleng. He hla hi a nalh a, Michael M. Sailo ngei mai kan la hmu bawk a, mi tam tak rilru hnehtu a tling. A hmain pasa­rihna a ni a, pathumnaah a rawn zuang chho dawrh a ni. Pakhatna pawh lo luah tawh Mathlenga hla ‘Zawlkhaw dingdi’ chu palinaah a chhuk thla a, Marshall FK leh Ruatfeli te zai ‘Fahrah Nun’ chu panganaah bawk a awm.

Top 10 aṭangin Pantei hla ‘Tawnmang’ leh Intonation hla ‘Tlai khat’ te an chhuak a, 7th String hla thar ‘Mizoram' leh DJ Lalvenhimi hla ‘Ka tan i chuai’ tihte an rawn lang thar thung.

Hontrade Ṭhazual Lengzem
1 Manuna - Duhaisam
2 Michael M Sailo - Thinlai Hnemtu
3 Zorinzuali Khiangte feat 135 - Ka ngaidam che
4 Mathlenga - Zawlkhaw Dingdi
5 Marshall FK ft Ruatfeli - Fahrah nun
6 DJ Lalvenhimi - Ka tan i chuai
7 Lilzo - Ka pa
8 7th String - Mizoram
9 Aziri - Engvangin nge
10 C Sanga - Lungrunpui