Andrew Laltlankima A ‘Zu rui ṭawngṭaina’ video chu le

Andrew-a hian ‘Zu rui ṭawngṭaina’ hi June thla khan audio-in a lo tichhuak tawh a, Mizostore-ah pawh a zuar chhuak tawh nghe nghe. Lyric video-in a siam leh a, lyric video-a siamtu hi RZA Boitlung a ni. He hla hi Kings & Prophets-a record a ni a, YouTube-ah pawh dah nghal a ni ang.

Hla ṭha deuh deuh, tunlai nun khawih tak tak hi Andrew hian a phuah chhuak thiam viau mai. ‘Zu rui ṭawngṭaina’ hi Andrew-a hian January thlaa a phuah kha a ni a, a phuah chhan pawh a ngaihnawm. “Ṭhian hrang hrang ka nei a, zu heh ve deuh deuhte pawh an ni. An zingah ka chên hian heng mi, miin misual bera an ngaihte pawh hian Pathian hi an lo la dah pawimawhzia ka hmu. An nun kawngah Pathian ṭihna reng nei lo angin mi chuan kan ngai mai thei a, mahse an bula han khawsak tak tak chuan Pathian hian an nun chhungril a lo la luah hle tih ka hmuhin he hla hi ka phuah ta a ni,” a ti.

‘Nunna thar’ hmanga Zoram dung leh vang fan chhuaktu hian tuna a hla thar bakah hian kumin chhung hian hla tihchhuah zeuh zeuh a tum. Album tihchhuah lehte pawh a ngaihtuah nachungin, tunlai Mizo music industry ngaihtuah chuan thil buaithlak leh risk sang tak a ni tawh. Hei ai hian single tihchhuah zeuh zeuh a fuh tawh zawk tlat. Hetiang lamah hian hma pawh a la chho deuh dawn.

Andrew-a chuan, “Hla record sa chu ka ngah a, a ṭul dan ang azirin ka tichhuak zeuh zeuh ang,” a ti. Hla a phuah thiam a, a zaithiam bawk a, chuvang chuan a hlate hi ngaihthlak a chakawm viau zel.