Mizo film chhuak thar tur 'Hawrawp Hnuhnung Ber'

Mizo film thar 'Hawrawp Hnuhnung Ber' chu karleh August 25 hian tlangzarh a ni dawn.

He film hi May 5 aṭang khan shooting ṭanin tunah chuan a hmawr an bawk fel tawh a, tlangzarh mai theih turin an peihfel tawh. Karleh Ningani zanah hian Vanapa Hall-ah an 'premier' tawh dawn a ni.

'Hawrawp Hnuhnung Ber' hi Melody G Fanai direct niin Zoramchhana chu producer a ni a, Laldawnpuii chuan script a ziak thung.

Mizo film danga kan hmuh tawh zingah inlan tur an awm nual a, lemchan lama sulhnu la nei lo hmelthar hmuh tur an awm tel dawn bakah zaithiam inlan turte pawh an awm dawn bawk. 'Call 112' a hnehsawh taka lo inlan tawh leh Bollywood lam thleng pawha lo inlan tawh Eddie Tochhawng hmel hmuh tur a awm dawn a, RJ Mickey pawh he film-ah hian a inlan dawn a ni. Anni mai bakah hian zathiam Ronald Zothantluanga, Zirtluangpuii leh Lalthlengliani-te chu inlan tur zingah an la tel cheu.

Ronald Zothantluanga hian 'Hawrawp Hnuhnung Ber' OST a sa nghe nghe a, Bzi Chhangte pawhin OST 2 a sa a, anni bakah hian Henz zai pawh he film-ah hian an hmang.

He film-ah hian Miss India Mizoram 2022 Hlutei a inlan dawn a, Zofate an fiamthu hmanga min tihlim ṭhintu Kung leh Hrangite hmel pawh hmuh tur a awm dawn. Youth Icon top-5 Tlanmawia Ralte zai pawh he film-ah hian ngaihthlak tur a awm dawn bawk a ni.

Vanapa Hall-a premier a nih hunah hian a hmunah en duh tan ticket an chhawp chhuak nghal dawn a, 'Runmawi Apps' lamah man tlemte chawia en theih turin an dah chhuak bawk ang.