Instagram-a hlawh hnem ber Selena Gomez

I kalna thlalak apiang dah tur net pack thuna pawisa i sên keuh keuh lai khan Selena Gomez chuan sum a lo rût keuh keuh thung. Selena Gomez hian Instagram-a sponsor thlalak post pakhat zelah £ 425,000 (USD nuai 5.5) a hlawh bik zel a nia aw! Amah aia lar leh turu zawka i ngaih tam tak khan Gomez hi an tluk miah lo. Instagram-ah follower maktaduai 122 lai a nei bawk a, a lar a, a hlawhtling a tih loh theih loh.

Instagram aṭanga sum lalut hnem ber dawttu chu Kim Kardashian a ni leh daih. Kim K hian IG-ah follower maktaduai 100 a nei a, hei vang hian a hlawh pawh a ṭha khawp mai, sponsor-tute tilang thei thlalak pakhat zelah £ 387,000 lai a hlawh ziah. Cristiano Ronaldo chu IG aṭanga sum lalut hnem pathumna a ni. He footballer ropui hian zuitu maktaduai 104 lai a nei a, Kim K ai pawhin ngah zawk mah se, hlawh tam lamah chuan Kim-i hi a tluk lo. Ronaldo hian a thu post pakhat zelah £ 310,000 zel a hlawh.

Jenner unau chu palina leh panganaah an awm. He mite unau hi tunlai khawvelah na na na chuan khawvel mit fûkna an ni. Kylie Jenner hian follower a ngah zawk a, chuvang pawh chu a niang, a hlawh hnem zawk. Kylie hian IG-a thlalak pakhat a post hian £ 310,000 tho, Ronaldo hlawh zat tho a hlawh a, Kendall Jenner, follower makta­duai 81.7 neitu hian thu post pakhat zelah £ 286,000 zel a hlawh bawk.

Kardashian-Jenner chhungkua hi social media-ah chuan an lo turu hle tih a lanna chu Instagram-a hlawh hnem 10 zingah an lang tuar mai. Khloe Kardashian chu parukna a ni a, Kourtney chu pasarihna a ni. Midangah chuan Cara Delevingne chu pariatna a ni a, Gigi Hadid chu pakuana niin, LeBron James chu 10-na a ni.