YouTube-ah ‘See you again’ in ‘Gangnam style’ a lehpel

Furious 7 soundtrack atana hman, Paul Walker hriatrengna pual ni bawk ‘See you again’ hi a mawi mai bakah miin an ngaihlu hle a, hei vang hian YouTube-ah pawh entu an ṭhathnem phah hle. Psy-a’n record a siam, YouTube-a video entu ngah ber chu a rawn khum ta a ni. ‘See you again’ hla hi kum 2015-a tihchhuah kha a ni.

‘Gangnam style’ hla hi kum li kaltaa YouTube-a dah kha a ni a, tun thlengin he video hi vawi tluklehdingawn 2.89-in en a ni tawh a, chu chu India mipui let hnih aia tam a ni. ‘Gangnam style’ record hi ‘See you again’ hian rawn lehpelin, vawi tluklehdingawn 2.9 en a ni. An intam hleihna erawh a tam lo hle.

Charlie Puth a lawm hle a, Twitter-ah, “Kum 2007 aṭang khan YouTube hi ka zawm ṭan a, chutih­lai chuan video, vawi sing khat en tlin neih theih ka duh ve hle ṭhin. ‘See you again’ hla chungchang ka hria a...wow’ a ti. A tira a tum leh tuna a thlen chin chu a inthlau ve tawh hle.

YouTube-a en nasat video zing­ah hian Justin Bieber-a hla ‘Sorry’ te, Mark Ronson leh Bruno Mars hla ‘Uptown Funk’ te, Taylor Swift hla ‘Shake it off’ hla te, Maroon 5 hla ‘Sugar’ leh Katy Perry hla ‘Roar’ te a lang.

YouTube-a video entu tam ber ni ṭhin chu Psy-a hla ‘Gangnam style’ kha a ni a, mahse tunah chuan Wiz Khalifa leh Charlie Puth te sak ‘See you again’ chuan a rawn lehpel ta.