K-Pop contest Mizoram aiawh tur Immortal Army leh C. Lalngaihsangi
Korean Cultural Centre India leh Mizoram K-Pop Fan Club te ṭangkawpin an buatsaih, K-Pop Contest 2017 intihsiak result chu puan chhuah a ni ta a, dance category-a Mizoram aiawh tur hi Immortal Army, Champhai District niin, Vocal Category-ah C. Lalngaihsangi a ni.
Dance Category-ah hian Champhai District-a mi, Immortal Army chu pakhatna an ni a, pahnihna hi Arunachal lama dance crew, The Trend niin, Aizawla mi Blue Ace chu pathumna an ni. Vocal category-ah hian C. Lalngaihsangi, Lunglei District chu pakhatna a ni a, pahnihna pawh Lunglei District-a mi tho Emes a ni. Aizawl khua Faith and Jace chu pathumna an ni.
He contest-a dance leh vocal category-a pakhatna ve vete hi Delhi-ah an zu lâm leh ang. Delhi-ah hian July 29 khian K-Pop Contest, India-a a pui ber hi neih a ni ang.
KCCI leh MKFC te hian event lian tham tak tak nei turin hma an la mek. MKFC te hian vawiin hian Kpoppers’ Meet chu Chanmari YMA Hall-ah a buatsaih dawn a, hetah hian K-Pop contest 2017-a tel te an perform leh dawn a, entry hi mi pakhatah Rs. 50 zel a ni.