Israel-a Radiohead concert turah Thom Yorke a kâ a âng

Radiohead chuan karleh khian Israel sumdawnna khawpui lian Tel Aviv-ah concert an nei dawn a, sawiselna a nasa hle a, zaithiam dang tam takte pawhin he rama concert lo turin an nawr. Hetiang karah hian Radiohead chuan an tum chu an titlang dawn tho tih an sawi a, a chhan pawh an sawi chiang.

Radiohead-a an lead singer Thom Yorke chuan, “Mi rama va concert hi an sorkar nen inzawmna neih nen a inang lo. Kum 20 chhung khan Israel ramah hian concert kan nei fo tawh a, chutih chhung chuan an ramah sorkar hran hran a ding. A ṭhen chu liberal takte pawh a ni. Netanyahu aiin Donald Trump hi kan duh lo zawk a, chuti chung chuan America-ah pawh kan concert tho a ni,” a ti.

Israel rama Radiohead-in concert an neih tur hi a tir phat aṭangin sawisel a hlawh hle. Israel sorkarin Palestinian te rama Judate chênna tur in a sak avangin Israel hi an duh lo a ni ber. Hma latu ber chu Artists for Palestine an ni a, Palestinian mite chu South Africa-a midumte thleibik an nih ang khan Israel-ah pawh hian en hran an ni, ti ang zawngin an sawi a ni.