The Beatles record khumtu Drake

Canadian rapper Drake chuan kum 55 lai The Beatles-in record an lo chelh tawh chu a khûm ta!

Billboard Hot 100 chart top 5 hit hla nei ngah ber ṭhin chu The Beatles kha an ni. Kum 55 chhung zet he record hi chelhin Hot 100 top 5 hit hla 29 an nei. Mahse tunah chuan chu chu a danglam ta.

Drake chuan Billboard Hot 100 chart-ah DJ Khaled leh Lil Baby a thawhpuina 'Staying Alive' chu pangana a nihpui a, he hla hmang hian The Beatles-in kum 55 lai record an lo chelh tawh chu a khum ta a ni. Heti hian Drake hian Billboard Hot 100 top 5 hit hla 30 a nei ta chiah.

Heti hian Drake hian a record lo siam sa tawh chu a belh hrim hrim a, top 10, top 20, top 40 leh Hot 100 hrim hrima a record lo siam tawh sate chu a belhchhah ta tihna a ni bawk.

Hot 100 No.1 hla pasarih a nei tawh a, Hot 100 a lang hrim hrim hla 277 nei tawhin top 10-a lang phak hla 44 nei tawhin chungte chu record dinglai mek a ni vek!

Chart-a che ṭha zualte
Billboard Hot 100 chart-ah hian Beyonce 'Break My Soul' bawk pakhatna ni lehin kar hnih chhung pakhatna a ni ta. Harry Styles 'As It Was' chu pahnihna a a la ni phak a, Lizzo 'About Damn Time' chu pathumna a ni thung.

Billboard 200 chart lamah chuan Bad Bunny 'Un Verano Sin Ti' bawk pakhatna a ni leh a, kar riat pakhatna ni tawhin kar hmasa lama roreltu Beyonce 'Renaissance' chu pathumnaah a tlahniam ve leh thung a ni. YoungBoy Never Broke Again 'The Last Slimeto' chu pahnihna a ni a, Eminem 'Curtain Call 2' pawh paruknaah a rawn lang pha bawk.

Artist 100 chart lamah erawh Beyonce pakhatna a ni a, Bad Bunny chu pahnihna niin YoungBoy Never Broke Again chu pathumna a ni.