Mood Station hla thar tur a pui dawn

Rolling Stone India '10 Best Indian Singles of 2019'-a an hla lang phak ngat Mood Station chuan Thawhṭanni hian hla thar 'Kut zunglai hmuh rawh' an tichhuak dawn.

Mood Station hian an album pahnihna tur 'Pu Ṭeka' an buaipui mek a, tlangzarh a nih hun tur la hre chiah lo mah se 'Kut zunglai hmuh rawh' hi an album thar tura mi a ni a, sukpui dual dual theih tur a nih leh beisei ang.

'Pu Ṭeka' album hi heavy metal/rock fir hlang a ni dawn tih vocalist Tp-a chuan a sawi a, "Heavy metal tih hian sawifiah ka duh chu, a music ai mah pawhin a hla thu heavy hi heavy metal/rock chu a ni. Mizoah hian music chu heavy ṭhin mah se hla thu hi heavy tak ka la ngaithla chiah loa chuvang chuan tun album hi chu a heavy dawn hle a ni, ka tum lian ber pawh a ni," tiin Vanglaini a hrilh. 'Kut zunglai hmuh rawh' pawh hi a heavy ngei dawn tih a chiang.

Thawhṭanni tlai dar 5 hian Mood Station official YouTube channel-ah an hla thar hi an dah chhuak dawn a ni.

'Kut zunglai hmuh rawh' hi Mizote'n kan la neih ngai vak loh, khawthlang lam heavy metal band-ten an uar tak si 'protest song' a ni dawn.

"Mi mitmei veng reng renga nun hman hi a hneawm a,chetsual hlau reng renga nun hman hi a hahthlak a ni. Inthlahrung reng renga nun hman hi a khamawm tawh.  Kan ramah chuan khap a tam si a, sawisel an ngah si a, a chanve an lungawi a, an hlim a, an lal len laiin a chanve tan hmun chep tak a chang reng mai si a; pawl pakhat duh dan lal berna ram leh sorkarna a ni miau si a, chuvang chuan i zalenna hla ni se. Tih theih kan nei tlem si a, i theihna hmun awmchhun hi ṭangkai takin i lo hmang dawn nia, a chanve inkiltawihte te hla tur a ni e," tiin an hla thar tur chungchang hi Tp-a chuan a sawi a ni.