Transformers Animated Movie thar siam dawn
Transformers animated movie thar siam a ni dawn a, Paramount Pictures leh Transformers neitu Hasbro studio eOne chuan Oscar hial pawh lo dawng tawhtu, Toy Story 4 director Josh Cooley chu film siam tur hian inremna an ziahpui.
Transformers movie thar tur hi animated movie ni dawn mah se budget a sang dawn hle a, prequel movie a ni dawn a, hemi vang hian Transformers fan-te tan chuan a hmuhnawm hle ang. Optimus Prime leh Megatron inlaichinna lam tihlan a ni dawn a, Autobots leh Decepticons history leh engtin nge an inkarah khi a lo awm ṭan dan tihte pawh a lang mai thei a, Transformers planet Cybertron lamah an che tla dawn a ni.
Deadline chuan live-action movie nen chuan a inzawm dawn lo niin an tarlang a, hripui len zawh hnu lamah chuan animated movie siam hi a awlsam zawk dawn a, social distancing dan zawm chunga siam a awlsam dawn avangin Paramount & eOne pawh hian animated movie lam hi an hawi ta zawk niin an tarlang bawk.
Marvel Cinematic Universe film Ant-Man leh Ant-Man and the Wasp ziaktu Andrew Barrer & Gabriel Ferrari-te chuan Transformers film thar tur script hi an ziak tawh a, a film title tur la tarlang lo mah se working title atan erawh 'Transformers One' tih an hmang a ni.
Transfomers hi TV series leh live-action movie eng emaw zat siam ni tawh mah se animated movie erawh an la siam tam lo hle. Kum 1986 daih tawha siam animated movie 'The Transformers: The Movie' bak kha animated movie dang an la siam leh lo.