Taylor Swift: Twilight: New Moon-ah khan inlan a chak! Mahse... Director-in a phal lo!
Stephenie Meyers lehkhabu ziah behchhana siam 'Twilight film series' kha tam tak chuan kan la theihnghilhin a rinawm loh. A hunlaia a lar zia leh ṭhalai, a bikin tleirawlte titi ber pakhat a nih ṭhinziate kha âw! Kha film kha a hunlai khan Taylor Swift pawhin a lo atchilh ve lutuk a lo nia, a film series pahnihna 'New Moon'-ah phei kha chuan inlan ve a lo dil hial a niawm asin mawle!
Achangtute leh a plot a tibuai thei dawn a ni: Director Chris Weitz
The Twilight Effect podcast episode thar, Thawhlehnia tihchhuahah chuan director Chris Weitz chuan hemi chungchang hi sawi chhuakin, Ashley Greene leh Melanie Howe-te host podcast-ah chuan Taylor Swift inlan tura dilna awm chu a hnar thu a sawi chhuak. Mahse, amah pawhin chu chu thutlukna siam harsa tak a nih thu a sawi.
"Taylor Swift kha Twi-hard a ni a, khatih hunlai khan agent inang kan hmang nghe nghe. Chuan ka agent chuan, 'He movie-ah hian Taylor inlan ve a duh a, nangmah vang ni loin, Twi-hard a nih vang zawkin,' tiin min hrilh," tiin Weitz chuan a sawi a, screen-a Swift inlan chuan achangtute leh a plot a tihbuai theih thu sawi zuiin,"Ka tana thil harsa ber tur lai chu, screen-ah Taylor Swift a rawn lang anga, minute nga vel, chutih hunlai chuan tumahin thildang an ngaihtuah thei dawn lo a ni," tia sawi zawmin,"Keimah leh keimah ka inpet hial, a chhan chu- wow, Taylor Swift ka chhuahpui thei dawn asin mawle, tiin ka inngaihtuah a," a ti. Mahse a chang chuan film tana ṭha ber turin thutlukna kan siam ve a ngai ṭhin a ni, tiin a sawi zui a ni.
Twilight leh Swift an inhlat chuang lo e
Taylor Swift chuan Twilight chu thui tak a kalsan lem lo tih kan hriat tlan tho kha. Werewolf Jacob Black lema chang Taylor Lautner nen hun eng emaw chen inkawp zuiin rom-com fillm 'Valentine’s Day'-ahte pawh an chang dun a nih kha.
Twilight Saga kha
Vampire romance fantasy film series 'The Twilight Saga' kha film panga siamin khang film panga siamna atan khan $maktaduai 401 vel an seng a, a hlawhtling rem rem hle. Film panga aṭang khan $tluklehdingawn 3.346 vel lai a lalut .
A film hmasa ber Twilight kha kum 2008-a tihchhuah niin a film hnuhnung ber 'The Twilight Saga: Breaking Dawn – Part 2' kha kum 2012-ah an tlangzarh bawk a ni.