BLACKPINK an rawn 'comeback' tak tak e

PUBG in-game virtual concert lamah chuan thawm an nei deuh rek rek tawh reng a, niminah erawh khawvel tak tak an rawn dai leh ta.

Kum hnih vel zet hla thar an tihchhuah mumal tawh loh hnuah Blackpink chuan nimin khan single 'Pink Venom' chu an tichhuak ta. YouTube lamah thlirtu an pung chak a, an tlangzarh aṭanga darkar khat chhung lekin thlirtu maktaduai 10 an awm tling hman hial! Audio ngaithla duh tan pawh streaming platform hrang hrangah ngaihthlak tur a awm tawh.

'Pink Venom' rual hian Blackpink hian #PinkVenomChallenge on YouTube challenge an siam nghal a, an fan-te chu an dance move mawi tak nena an chevel post turin challenge an siam a ni.

Jisoo, Jennie, Rosé, leh Lisa-te hian an hla thar hi August 28-a sem tur MTV Video Music Awards-ah an perform nghal dawn niin Billboard chuan nimin khan a tarlang.

Blackpink hian October thla aṭang hian world tour ropui tham tak an nei chhunzawm nghal dawn bawk a, tin, September 16 hian album thar 'Born Pink' an tichhuak dawn bawk a ni.