Dio: Dreamers Never Die: Ronnie James Dio Documentary September-ah

Heavy metal legend Ronnie James Dio Documentary 'Dio: Dreamers Never Die' chu khawvel ram hrang hrangah theatre-ah chhuah a ni dawn a, BMG leh Trafalgar Releasing kaltlangin September 28 leh October 2-ah chhuah a ni ang.

'Dio: Dreamers Never Die'-ah hian 50's chhoa Dio rawn lar chhoh dan, band tenau tak aṭanga khawvela rock band ropui ber ber vocalist a nih chhoh dan hmuhtur a awm dawn. Dio hi kum 2010 khan kum 67 mi niin pumpui cancer vangin a thi a ni.

Rainbow leh Black Sabbath bakah ama hmingchawi band Dio vocalist ṭhin Ronnie James Dio Documentary-ah hian a boral san tak a nupui leh a manager ṭhin Wendy Dio chu executive producer a ni a, video footage tunhmaa la tlangzarh ngai loh eng emaw zat hmuh tur a awm dawn. Chumai bakah chuan a ṭhian leh bandmate ṭhin- Tony Iommi, Geezer Butler, Glenn Hughes, Vinny Appice, Lita Ford, Rob Halford, Sebastian Bach, Eddie Trunk leh Jack Black-te interview-te pawh dah tel a ni bawk.

Ningani khan YouTube lamah teaser video tawite an dah chhuak tawh nghe nge a, Dio fan-te tan chuan en ngei chi a ni ang.

'Dio: Dreamers Never Die' documentary siamna tur sum hi BMG chuan tumin Don Argott leh Demian Fenton-te chu director an ni. "Ronnie James Dio ang mihring nghet, talent nei ṭha leh thinlung ṭha hi tunlaiah chuan hmuh tur an tlem tawh. A chanchin, amaha inrintawkna awm leh a duhthusam thlengdik tura a beihna thawnthu midang hnena hmuhtir thei tura kan awm hi a lawmawm hle. Dio fan kan nih angin, Ronnie zinkawng screen-a kan pholang tur hi kan inchhuangin tihchhuah hlan kan ngahkhlel tawh hle," tiin Don Argott leh Demian Fenton-te chuan an sawi.

He documentary hi Los Angeles leh London-ah premier a ni dawn a, chumi hnuah chuan ram hrang hrang theatre-ah ni hnih an tichhuak leh dawn a ni.