Mizo Idol ; Mi 20 chiah intihsiak tur an awm ta

Mizo Idol Season 7 intihsiakna boruak a sang chho zel a, tunah phei chuan mi 20 chiah intihsiak tur an awm tawh.

Kar hmasa Ningani leh Zirtawpni zan khan top 50-te chu intihsiakin Inrinni zan khan result puan a ni a, che ṭha zual 20 la awmin chung mite chu August 25 leh 26 hian an intihsiak leh dawn a ni.

Top 20 chinah hi chuan track an hmang thei tawh dawn a, judge-te sawi fo angin contestant-te an zai thiam tawh hlawm si a, an fin thiam a ngai dawn. Ṭan ulh vangin an hla sak tur mil lo deuh track an siamtir palh thei! An zai cheimawitu leh puitu tur khan an zai a tihnawkin a tingaihnawm lo let daih thei tlat. Contestant-te tan fimkhurna tur a tam zual sauh dawn tihna a ni.

Zaithiam 400 chuang aṭangin mi 20 chiahin intihsiakna an hmachhawn thei tawh dawn a, chuvang chuan boruak a lian lo thei lo. Veng leh khua angin ṭan a na zual sauh dawn tih a chiang a, chu chuan show a tihlu chho dawn. Intihsiakna pawh a ngaihnawm chho sawt dawn tihna a ni a, Top 20-te zai ngaihthlak hlan a nghahhlelhawm tawh viau mai.

Ningani leh Zirtawpni lo awm tur zanah an intihsiak leh hnuah Inrinni zanah result puan a ni leh dawn a, chutah chuan Top 10 a hriat tawh dawn. Mizo Idol 2022 hi September thla tawp hmain a hmawr bawk hman an tum a ni.