Lalnunpuia Hrahsel A album aṭanga hlawknate ṭanpui nan a pe vek dawn

Tunlaia Mizo Kristian hla ṭha tak tak phuah chhuaktu, 'Harhna Ropui' phuahtu Lalnunpuia Hrahsel chuan a album a tihchhuah hunah, he album aṭanga hlawkna a hmuh zawng zawngte ṭanpuina atan a hmang dawn.

Lalnunpuia Hrahsel hian a hla phuahte khungkhawmin album-a tichhuak turin a buaipui mek a, he album-ah hian tunlaia gospel singer kan neih ṭha tak takte an zai. Album tihchhuah a nih hunah hlawkna awm zawng zawng chu Ṭawngṭai Bethel Camping Centre, Chawnpui tan a hlan dawn. A album thar tur hi ‘Lalpa mi hriat’ tih a ni.

‘Harhna ropui’ hla phuahtu hian a hla phuahte album-a siamin a tichhuak nual tawh a, tun ṭuma mi a album palina tur a ni. A album tihchhuah hnuhnung ber chu ‘Saiip puan sin’ tih a ni a, album ṭha leh hlawhtling tak niin, Lelte Award-ah Album of the Year leh ‘Harhna ropui’ hla chu Song of the Year-a thlan a ni. ‘Lalpa mi hriat’ album-ah hian ama hla phuah bakah Sap hla lehlin a tel nual dawn; a hla phuah paruk a awm ang a, lehlin hi panga a awm ang.

‘Lalpa mi hriat’ album-ah hian Nunna Thar film lama kan hmuh, chang thiam zet mai, Sangtei Renza chu zai zinga mi a ni a, ani hian’Ka hmangaih che’ tih hla a sa a, ani bakah Pensy a zai bawk a, Pensy hian a album hming put chhan hla ‘Lalpa mi hriat’ a sa. Sawmtea, RC Lalruatdika, Makima, Ruth CVL Muanpuii, Temi Sailo, Mawitei leh Hriat-hriati te chu zai zinga mi an ni.