Larsen C ice shelf a phel Tuipui tui lum tawh vang niin ngai

Tun thla khan Antarctica-a Larsen C ice shelf aṭangin vur tlang lianpui mai, Lunglei District pum aia lian (sq. km 5,800-a lian, Lunglei District hi sq. km. 4,536) chu a keh phel a, mithiamten an ngaihven hle. Mithiam tam tak chuan a hmaa Larsen ice shelf dang keh­te angin global warming nen a inzawm leh zawm loh chiang takin sawi thei lo mah se, mithiam ṭhenkhat chuan global warming avanga tuipui tui lum zel vang niin an ngai.

Larsen C-a khi hi a hma pawhin hmuh a ni tawh a, satellite aṭanga thla lakah chuan kum 1963 vel pawh khan khi a awm tawh tih hmuh a ni. Tunhnaiah khi hi a keh ta nge nge a ni ber. Antarctica-ah tunlai hi thlasik vanglai tak a nih avangin scientist-te chuan satellite aṭangin an thlir nachungin hmuh a harsa deuh niin an sawi.

Colorado State University-a glaciologist, Dan McGrath chuan, “Hetiang keh thla tur hian kum 2014 khan eng thil nge danglam kan hre rih lo. Antarctic Peninsula hi hrim hrim hi kum zabi 20-na chawhnu lam aṭang khan khawvela hmun lum chak berte zinga mi a ni hrim hrim. Khawlum chak hian environment in­thlak danglamah thuk takin nghawng a nei a, chumi avang chuan Larsen A leh Larsen B pawh a lo keh darh phah tawh a ni,” a ti.

McGrath chuan, “Larsen C keh chung­changah hian khawlum zel nena direct taka a inzawmna a neih leh neih loh kan la sawi mai thei lo. Amaherawhchu inzawmna eng emaw tak a nei ngei chuan a lang. He shelf innghahna hi tuipui tui lum zelin a ei chhia a nih a rinawm khawp mai,” a ti.

Tuna Larsen C aṭanga keh thla A-68 iceberg an tih hi kum 2010 aṭang khan a khik dan mi­thiamten an lo thlithlai reng tawh a, July 10 leh 12 inkar khan a keh chhuak ta a ni. Brigham Young University-a Antarctic Iceberg Tracking Data-in a tarlan dan chuan kum 2000 March thlaa Ross ice shelf aṭanga B-15 iceberg keh chhuak ta kha chhinchhiah china keh chhuak lian ber a ni a, sq. km. 11,000 zeta lian a ni a, Mizoram chanve tiat a ni. Satellite record hmaa mite nena lian bera ngaih chu kum 1956-a Scott Island bula mi kha a ni a, km 333 leh km 100 bial zet a nia sawi a ni.