Billboard Hot 100 chart-ah a vawi 10 nan Despacito

Billboard Hot 100 chart-ah Louis Fonsi, Daddy Yankee leh Justin Bieber-te sak Despacito chuan pakhatna a la luah a, hla ropui zingah he hla hi a inhlangkai ta.

Despacito hi a vawi 10 nan Billboard Hot 100 chart-ah hian pakhatna a luah leh a, Hot 100 chart-a vawi 10 pakhatna luah thei hla 35 zingah a rawn inhlangkai ta a ni. Hot 100-a pakhatna luah thei hrim hrim hi hla 1,065 zet a awm tawh a, vawi 10 chhung zet mai pakhatna luah thei hla erawh a la tam lo hle.

DJ Khaled leh Rihanna leh Bryson Tiller te sak Wild Thoughts chu Billboard Hot 100-ah hian pahnihnaah a rawn kai chho a, hetihlai hian a hla dang, Justin Bieber, Quavo, Chance The Rapper leh Lil Wayne te nena an sak I’m The One chu pathumnaah a chhuk thla thung. Bruno Mars hla That’s What I Like chu palinaah tla thla bawk. Ed Sheeran hla ‘Shape of You’ chu panganaah a la ding.

Hetih mek lai hian Ed Sheeran-a pawh internet lamah sawiselin sawichhe vak vak mah se, a neu tak tak thei lo. A hla ‘Shape of You’ chu chawlhkar 27-na atan Hot 100 top 5-ah a la lang thei a, Hot 100 chart top 5-a chawlhkar 27 chhung lang thei hla tlem te zinga mi a ni. Shawn Mendes hla ‘There’s Nothing Holdin’ Me Back’ chu top 10-ah a rawn lang bawk.

Hot 100 chart-ah hrim hrim hian, Glee Cast (film OST) kha lang ngun ber a ni a, vawi 207 a lang. Drake chu lang ngun ber pahnihna niin, vawi 157 a lang tawh a, Lil Wayne chu vawi 136 langin, Hot 100 chart siam chinah Elvis Presley chu vawi 108, Jay-Z chu vawi 96, James Brown chu vawi 91, Chris Brown chu vawi 84, Kanye West chu vawi 81, Nicki Minaj chu vawi 79, Ray Charles chu vawi 75 leh Aretha Franklin chu vawi 73 an lang.