Ram thatchhe ber zingah India tel!

Hnathawh lam chu a ni chiah lo, kea kal hnem lamah a ni ber ang chu. Stanford University-in ram 46 te kea kal peih leh peih loh chungchang an zirchiannaah India ram chu ram thatchhe berte zinga mi a ni. Kea kal phakna rengah pawh motor hmang hram an tam hle tihna a ni.

Stanford University-in ram thatchhia a zirnaah hian China leh, a bikin Hong Kong chu kea kal nasa ber ram an ni a, ni khatah mi pakhat kal thui lam hi pên 6,880 lai a ni a, India chu 39-na daih niin, ni khatah mi pakhatin pên 4,297 a pên.

Stanford University hian ram 46-a mi nuai sarihte phone-ah kea an kal tam dan chhui zuitu an vuah a, chuta ṭang chuan he tehna hi an siam a ni. Indonesia chu ram thatchhe ber a ni a, ni khatah mi pakhat hi kein pê 3,513 bakah a pên lo. Chawhrualin khawvel pumah mi pakhatah hi ni khatah kein pên 4,961 zel pên ang a ni a, khawvel pum average pawh India chuan a phak lo tihna a ni.

Kea kal nasa ram te chu Hong Kong, China, Ukraine, Japan te an ni a, ni khatah pên sang ruk chung lam vek a ni. Malaysia, Saudi Arabia, Indonesia te chu kea kal tlêm ber ber ram an ni a, pên 3,900 hnuai lam an ni.

India-ah hian mipa aiin hmei­chhia an thatchhe lehzual. Mipain ni khatah pên 4,606 an pên laiin hmeichhia chuan pên 3,684 chauh an pên thung. Hei vang hi a niang, India-ah hian mipa aiin hmeichhe zingah thau lutukna a hluar nasa zawk hle.