THAZUAL LENGZEM-ah Chawngtinleri'n ro a rel

Ṭhazual lengzem chart-ah roreltu thar an awm a, chu chu tudang ni loin Michelle Varte a ni a, a hla thar 'Chawngtinleri' hmangin ro a rel a ni. Mimi Remruatsangi 'Vul zel rawh aw' chu pahnihna niin Marina Vanhriatpuii Varte 'Awithangpa hla' chu pathumna a ni bawk.

A zaithiam piah lama a zei vanga hriat hlawh tak Michelle Varte-in April thla laihawl vela a tlangzarh, a hla thar 'Chawng­tinleri' chu Ṭhazual chart-ah No.1 a rawn ni ta a, he hla ngaithla tawh leh music video en tawhte chuan mak an ti lo hle ang.

A hla a nalh piah lamah music video a hmuhnawm bawk a, chart-ah pawh hma a sawn chak hle a, a rawn inlan tirhin pariatna a ni a, a hnuah pathumnaah rawn invawrhin tunah chuan pakhatna a ni der tawh. John Mawitea & Mapuii Fanai-te hla 'Chawngtinleri' hi Michelle Varte hian a sa thiamin a aw nen pawh a inmil hle a, chu­tih rualin a music video hi sawi hmaih chi a ni lo. Video siam leh editing lama tawnhriat nei lo pawhin a hautak tur zia chu an hrethiam mai awm e, YouTube lamah pawh mi nuai 1.5 chuangin an thlir tawh a ni.

Mimi Remruatsangi chuan a hla 'Vul zel rawh aw' chu pahnihna a rawn nihpui leh a, he hla hi a hma pawhin No.1 a lo nihpui tawh kha a ni a, a dinhmun a tlahniam deuh dawn emaw tih laiin a rawn invawrh leh a ni.

Mizo Idol star Marina Van­hriatpuii Varte hla thar 'Awi­thangpa hla' chu pahnihna aṭangin pathumnaah a tawlh hniam ve leh hret thung. Rualthana 'I tan' chu palina niin Eddie Pachuau 'Lairil hma­ngaihna' chu pangana a ni ve bawk a ni.