Honda BigWing Ṭhazual Gospel ; Lalthansangi'n 'Ram ropui tak lo thleng tur' pakhatna a nihpui

Honda BigWing Ṭhazual Gospel chart-ah Lalthansangi chuan a hla 'Ram ropui tak lo thleng tur' chu pakhatna a nihpui.

'Heiden rial' hmanga Zofate thiam taka min lo awi tawhtu Lalthansangi hian thla khat vel liam ta khan 'Ram ropui tak lo thleng tur' hi a tichhuak a, Mizo rilrem zawng tak hla niin ngaihthlak a hlawh hle. YouTube lamah pawh thlirtu nuai 3.7 chuang an awm der tawh a, tunhnaia Pathian fakna hla tihchhuah zingah chuan 'hit' ber pawl a ni hial awm e. Zakunga hla lehlin niin Lalthansangi hian a sa mawiin music video pawh hmuh a nuam hle a, pakhatna ani pawh hi a awm hle.

Ṭhazual chart-ah hian Lalthansangi hi a che ṭha ṭhin hle a, a music video tihchhuah tho 'Lalpa min hruai zel ang che' chu pasarihna a ni mek bawk.

Hlimhlimi 'Ka hlan a che' chu pahnihna niin Fall Profane 'A khawngaihna angchhung' chu pathumna a ni ve thung.

Thawhlehnaniropuia 'Mangang aurawl' chu palina niin Benjamin & Isaac 'Engmah ka hlau tawh lawng' chu panganaah a rawn inhlangkai ve leh bawk a ni.

The Illusionist, Sangtei Hmar, R. Lalbiaksanga & K. Vanlallawmi leh Sailo Lalsangzuali-te pawh top 10-ah an lang.