Calvin Klein Fall 2022 Campaign-ah Jennie

Blackpink Jennie leh fashion company Calvin Klein chuan an thawhdunna tinghet chho zelin Calvin Klein Fall 2022 Campaign-ah pawh Jennie hi a tel dawn tih kar hmasa khan HypeBae chuan an tarlang.

Fall 2022 season campaign hi New York City leh Los Angeles billboard-ahte bulṭan a ni dawn a, tunthla tawp lamah hi chuan an ṭan tawh dawn a ni. Thlalak hrang hrang, Alasdair McLellan lakte chu Houston Street billboard, NYC leh La Cienega billboard, LA-ahte pholan a ni dawn.

Jennie hi Calvin Klein Spring 2022 community-themed campaign-ah pawh inlan tawhin milar tak tak- Dominic Fike, Solange, Vince Staples, Arlo Parks leh Burna Boy-te nen an inlan ho a ni.

Blackpink-te'n 'Pink Venom' hmangin record an siam
Blackpink chuan an rawn comeback-na music video 'Pink Venom' chu an rawn thlawh fuh leh rem rem hle.

Zirtawpni khan an music video thar hi tichhuakin YouTube-ah darkar 24 chhungin thlirtu maktaduai 86.2 an awm hman a, hei hi kumin atan chuan record a ni hial! Darkar 30 hnuah phei chuan mtd 100 chuangin an thlir hman a ni!

Kumin chhunga music video premiere pui ber a ni hial a, YouTube 24-hour views ranking-ah erawh palina a ni thung.

YouTube 24-hour views ranking-a pakhatna leh pahnihna chu BTS music video ve ve a ni a, pathumna erawh Blackpink tho an ni ve bawk.

BTS 'Butter' kha an tihchhuah aṭanga darkar 24 chhungin vawi mtd 108.2 lai thlir hman niin 'Dynamite' kha mtd 101.1 in an thlir hman bawk a, Blackpink hit 'How You Like That' kha vawi mtd 86.3 thlir hman a ni thung a, pathumna a ni. Selena Gomez an thawhpuina 'Ice Cream' kha pangana niin darkar 24 chhungin vawi mtd 79 thlirtu a nei hman a ni.