'House Of The Dragon' vangin HBO Max buai!

'Game of Thrones' prequel series 'House Of The Dragon' chu Pathianni khan HBO Max-ah episode hmasa ber dah chhuah a ni ta a, ngaihven a hlawh bawk a, subscriber ṭhenkhat chu HBO Max app-ah an luh theih loh phah hial.

Hemi chungchang avang hian application hmangtu ṭhenkhat chu Twitter lamah an zualko nghal a ni. A ruala en tumtu an tam avangin HBO Max chu rei lote mi ṭhenkhat tan a buai hial a, HBO Max support team lam pawhin buaina chinfel thuai an tum thu thuchhuah an siam phah a ni.

'House of the Dragon' hi George R.R. Martin 'Fire & Blood' lehkhabu behchhana siam niin 'GOT' hma kum 200 vel liam taa thil thleng anga chan a ni a, House Targaryen chungchang tarlanna series a ni. Paddy Considine, Matt Smith, Olivia Cooke, Emma D’Arcy, Steve Toussaint, Eve Best, Fabien Frankel, Sonoya Mizuno, leh Rhys Ifans-te chu a changtu ber niin season hmasa berah hian episode 10 a awm ang.

Episode hmasa ber chiah la tichhuak mah se ngaihven a hlawh nghal a, Rotten Tomatoes lamah chuan episode hmasa ber chu review-tu 353 zet an awm nghal a, rating pawh a hmu ṭha viau- 8/10 a hmu a ni.