Despacito Hla dang tluk loh hla chu

Billboard Hot 100-ah pakhatna vawi 10 zet a luah tawh a, chu mai chu a la ni lo, Despacito hla hi streaming khawvelah hla an stream nasat ber a rawn ni bawk.

Luis Fonsi leh Daddy Yankee, Justin Bieber-a tela an remix-na chu streaming history-ah, khawvela hla stream nasat ber a rawn ni ta a, January thlaa tlangzarh a nih aṭang khan vawi tluklehdingawn 4.6 zet stream a ni a, hla mala stream nasat ber a ni.

January thla khan Luis leh Daddy te hian ‘Despacito’ hla hi an tichhuak a, Justin Bieber hoin an remix a, remix hi April thla khan tihchhuah leh a ni. Tunah hian he hla hi US, UK leh Australia-ah te pakhatna a ni mek. Chart-a a hlawhtlin mai bakah hian streaming khawvelah a hlawhtling em em a, a hmaa Justin Bieber-a’n record a lo siam tawh chu lehpelin, khawvela hla stream nasat ber a ni ta a ni. Justin Bieber-a hian ‘Sorry’ hla hmangin stream nasat ber dinhmun a lo luah ṭhin a, remix leh original version zawng zawng nen he hla hi vawi tluklehdingawn 4.38 stream a ni.

‘Despacito’ hla hi January 13-a tihchhuah a nih hnu lawk aṭangin record a siam chho nghal. Spanish music video, darkar 24 chhunga Vevo-a entu ngah ber a ni nghal a, darkar 24 chhungin entu maktaduai 5.4 zet an tling nghal. Ni 22 chhung lekin vawi maktaduai 200 en a ni der tawh a, Spanish music video zinga maktaduai 200 tling chak ber a ni. Music video tihchhuah tawh zinga vawi tluklehdingawn hnih en tlin ran ber a ni a, ni 154 chhungin he video hi vawi tluklehdingawn 2 en a ni der.

Record thar siam thu hi Universal Music Group chuan a puang chhuak a, an CEO, Lucian Grainage chuan Luis Fonsi, Daddy Yankee leh Justin Bieber te a lawmpui thu a sawi chhuak.