EXO video tharin sawi a hlawh nghal

EXO chuan an album thar tur ‘The War’ hma­hruai atan ‘Ko Ko Bop’ an tichhuak a, fakna tam tak an dawn karah sawiselna pawh a ri chhuak nghal. Sawiselna ri chhuaka ngaihven hlawh, ni duh hmel ve tak mai chu mi music hman ve chung­chang (plagiarize) a ni.

EXO hla thar ‘Ko Ko Bop’ hi a music kal­hmangah reggae rhythm leh electronic base, bass-driven music a ni. Hla thunawn zawh chiahah bass-driven music rawn ri leh David Guetta, Nicki Minaj leh Lil Wayne te sak ‘Light My Body Up’ thunawn zawh chiaha bass-driven music te a inang hle a, hei vang hian mi tam tak chuan EXO hian David Guetta te hlaa music hi EXO hian an hmansak (plagiarize) niin an sawi. ‘Light My Body Up’ pawh hi a music kalhmangah chuan reggae rhythm leh bass driven-music, electronic base tho a ni. Heng hla pahnihte hi a tempo (beat ran zawng) pawh a inang hle niin an sawi.

Hei mai a ni lo, sawi­seltute chuan EXO music video thar lan dan hi Big Bang music video ‘Sober’ nen khan a scene a inang hle niin an sawi a, Bangtan Boys hla ‘Run’ nen pawh a inang hle niin an sawi bawk. Mahse heng hi chu phul hmun a lan ve vang mai mai a nih hmel a, a inanna a awm tam lo hle niin a hmuh theih. David Guetta hla, electronic base, bass driven lai vel hi chu a inhnaih ang reng.

Sawiselna chi hrang hrang hmachhawn nghal mah se, EXO hla thar ‘Ko Ko Bop’ hi a hlawhtling em em nghal tih loh rual a ni lo. July 18 khan tihchhuah ṭan a ni a, ram 36-a iTunes chart-ah ro a rel nghal. ‘Ko Ko Bop’ hla hi Chen, Chanyeol leh Baekhyun te phuah a ni.