Chester Bennington A thihnain khawvel a barakhaih

Alternative leh nu metal khawvela band hlawhtling, hriat hlawh Linkin Park-a an frontman, 2000 chhoa Zoram khawvel pawhin a aw kan ngainat a, kan ngaihthlak kham loh ṭhin, Linkin Park-a an vocalist, Chester Bennington chu anni rama (California-a) Ni­ngani zing lam, keini tana Ningani zan khan a thi a, a thihna hian khawvel a barakhaih hle.

Linkin Park frontman Chester Charles Bennington chu Ningani khan Palos Verdes Estates, California-a a inah a inawkhlum a, a ruang hi zing dar 9 khan hmuh a ni a, keini sanaah chuan Ningani zan dar 10 vel a ni. A hma pawhin Chester Bennington hian a nunah buaina a lo nei fo tawh ṭhin. Naupang a la nih laia an abuse ṭhin avangin a nunah buaina a nei chho fo. Kum sarih mi lek a la nih lai aṭangin, a kawm ṭhin zinga mipa upa zawkten bawlhhlawh takin an khawih ṭhin a, midang a hrilh chuan gay angah an ngai ang tih a hlau bawk si nen, hrehawm ti tak chungin a tuar lui hram hram ṭhin.

Kum 11 mi lek a la nih laiin a nu leh pa an inṭhen a, hetihlai vel aṭang hian ruihtheih thil a khawih chho ṭan a, a hnuah chuan a nun a buai phah hle. Hetianga nun harsa tak a tawn chhoh avang hian depression pawh a neih nasat phah hle a, intihhlum pawh a lo tum tawh ṭhin. He khawvelah hian tel ve loh mai a duh ṭhin a, a tel vena ‘Somewhere I belong’ a lo tih ṭhin hmun chu a pan ta a ni.

A thih ni tak hi ngaihven titamtu a ni. Soundgarden vocalist, Chris Cornell, mahni intihlum bawk, pian champha phak tak mai a ni a, hemi ni taka a intihlum hian sawi a hlawh lehzual hle. Chris Cornell nen hian an inngainain an inṭhian ṭha hle a, Cornell a thih khan Twitter-ah pawh a sûn reizia thu a tarlang nghe nghe.

Kum 1996 khan Samantha Olit nen an innei a, kum 2005 khan an inṭhen. Kum 2006 khan Talinda Bentley nen an innei leh a, a thih thleng hian an inkawp ta a ni. Bennington hian fa paruk a nei.

A thi tih chanchin a than hma lawk hian Linkin Park chuan YouTube-a an channel-a ‘Talking to Myself’ video an tichhuak a, he video hi an vocalist Chester thlahna video a ni ta ber mai. He video-ah hian Europe-a Linkin Park an tour vel tihlan a ni a, backstage-a an band member-te an ei a, an in­fiam bawrh bawrh lai tihlan a ni. He hla hla hi Chester Bennington-a phuah a ni a, a nupui, Talinda Bentley thlirna aṭanga a phuah a ni nghe nghe.

Music khawvelah
Bennington hi music lamah a tui hma hle a, Sean Dowdell and His Friends?-ah telin, hei hi a zai ṭanna hmasa ber a ni a, kum 1993 khan hla pathum awmna cassette an tichhuak. A hnuah post-grunge band, Grey Daze a zawm leh a, album pathum lai an record hman a, he band hi kum 1998 khan a chhuahsan. Linkin Park-in an vocalist tur audition an neihnaa a tel a, kum 1999 khan an vocalist atan an la ta a ni. A tel hnua Linkin Park album hmasa ber chu ‘Hybrid Theory’ kha a ni.

Kum 2005 khan Orgy leh Julien-K member, Amir Derakh leh Ryan Shuck te nen Dead By Sunrise band an din a, kum 2009 khan Out of Ashes album an ti­chhuak nghe nghe. Kum 2013 February thla aṭang khan Stone Temple Pilots chuan Scott Weiland aiawh turin an la a, kum 2015 thleng khan he band-ah hian an zai-pu ber a ni zui ta a ni.

1) Kum 1976, March 20 khan Phoenix, Arizona-ah a piang a, a nu hi nurse a ni a, a pa hi police detective a ni
2) High school an kal laia miin an tihduhdah bûr a ni. “Ka chêr avang leh ka lan dan a danglam deuh avangin school kan kal lai chuan naute lem ang maia hnek hlawh leh tihduhdah hlawh ka ni,” a ti.
3) Hit Parader-in Top 100 Heavy Metal Vocalists a thlan chhuah zingah Bennington hi a lang pha
4) Tharum thawhna hi a ngaina lo a, thil reng reng hi tharum thawhna tel loa chinfel theih nia ngaitu a ni. Kum 2011-a Tucson-a inkahna thleng chungchanga an kawmnaah pawh non-violence hi a sawi chhuak nasa hle
5) Film lamah pawh a chang ve. Jason Statham-a channa, Crank leh Crank: High Voltage-ah te khan a lang. Saw 3D leh Artifact te chu a channa dang a ni.
6) Kum 1996-a Saman Olit nena an inneih khan an rethei hle a, inneih zungbun leina tur pawh an nei lo a, a aiah an kutzungṭangah tattoo inang an chhuttir!
7) An band hla zinga a duh ber chu Breaking The Habit kha a ni a, a duh loh ber hla thung chu One Step Closer a ni