Katy Perry-i’n Taylor Swift a fak

Inkar boruak nei ṭha lo ve tak an ni a, mahse tunhnai aṭang khan Katy Perry hian Taylor Swift chanchin hi a ṭha lam hawiin a sawi chhuak ta fo. Tunah pawh Katy hian Taylor hi a dah sang hle tih a sawi leh.

Katy Perry chuan Taylor Swift nena an inkar hi ṭha reng loin, thua inbah nawk nawk awm fo mah se, Taylor Swift a dah sang hle tih a sawi a, a dinhmun pawh a ṭhat zel a duhpui hle niin a sawi bawk. Australia-a ‘Today’ show-ah he thu hi Katy hian a sawi chhuak a, chu mai bakah chuan, “Ka duh em em a, ka duh zel bawk ang,” a ti. “Inhmuh thiam lohna chu kan nei ṭhin ngei a, mahse kei chuan ‘A kal zelna turah Pathianin malsawm rawh se’ tih ka hrilh duh a ni,” a ti.

He mite pahnih inkara khi awm ṭanna chu kum 2014 aṭang khan a ni. Hemi kum hian Taylor Swift chuan ‘Red Tour’ a nei a, Red Tour-a a crew pathum lai chu Katy hian a chhuhsak niin Taylor Swift hian a sawi. Hemi hnu hian Taylor hian ‘Bad Blood’ hla a ti­chhuak zui a, he hla hi Katy a beihna hla a ni. An inkar boruak chhia hi Katy hian siamṭhat a tum hle a, hman deuh khan an inhmuhthiam lohna chu paihthlak a inhuam tih a sawi a, a chunga Taylor thil lo tih tawhah te Taylor hi a ngaidam tih a sawi bawk.