Tel Aviv - Radiohead an hlawhtling

Zaithiam dangte leh pawl chi hrang hrangten Israel rama concert nei lo turin an nawr luih luih nachungin Radiohead chuan concert an nei ta a, concert an neih ṭuma hun an la hman rei ber ṭum a ni.

Palestine leh Israel inkara boruak avangin Radiohead concert tur hi ṭhulh turin an nawr nasa hle a, zaithiam dangte sawisel pawh an hlawh. Chuti chung chuan Radiohead hi Yarkon Park, Tel Aviv-ah an concert a, midang runluih nana ti an ni nge ni lo tih chu hriat ni lo mah se, kum 10 hnua zan khata an perform rei ber ṭum an hmang. Radiohead hian hla 27 ngawt an sak bakah hla dang pahnih an belh leh.

Mi tam takin sawi chhe mah se, ṭantu erawh an nei nual. Israel-a piang, Palestinian mi zaithiam, Nasreen Qadri chuan Radiohead-te Israel-a concert lo tura an nawr lai khan ‘Min ṭhenhran an tum’ tiin, boruak a chhe zawng­a kal chu chhe lehzual tura siam tumah zaithiam dang­te chu a lo puh tawh a ni. “Sorkar tan an play dawn lo a, mipui tana play tur an ni,” a ti.