PRAISE ON SOLO COMPETITION 2022 September 26-ah ṭan dawn

Synod Information and Publicity Department (Synfo) leh Central Kristian Ṭhalai Pawl chuan Branch KṬP malzai intihsiakna 'Praise On Solo Competition 2022' chu Mizoram pum huapin a buatsaih leh dawn a, September 26 hian Kolasib-ah a hmasa ber atan elimination neih ṭan a ni ang.

Presbyterian Kohhran, KTP member-te tan he intihsiakna hi buatsaih a ni dawn a, registration form chu branch tinah thawn chhuah ni tawhin August 30 thleng a thehluh theih dawn a ni.

"He show hi Kohhran rawngbawlna pawimawh tak pakhat zaia rawngbawlna kawnga hmasawnna atan leh kohhran programme hrang hranga thinlung taka Pathian faka zai thei an lo punna atana buatsaih tur a ni. KTP Branch tinin an Branch chhunga mi zaithiam, Pathian fak duh mi, an Branch aiawh tur an ruat thei ang a, a zat chu Branch thu thu a ni ang. Branch ruat ni lo chu mimala tel a rem loang," tiin thuchhuah an siamah chuan an tarlang.

Aizawl khaw pawn hmun nga leh Aizawl khaw chhung hmun hnihah September 26 - October 2, 2022 chhungin Elimination round neih a ni dawn a, November 8 leh 17, 2022-ah final round neih tur niin November 18, 2022-ah result puan leh lawmman semna an nei thung ang.

Judge leh lawmman turte
Upa C. Vanlalvuana, Chanmari, Upa Zothanmawia, Khatla leh Stacy VL Muanpuii, Tuikual-te chu endiktu tur an ni dawn a, lawmman pawh a ṭha lehpek dawn hle.
Pakhatnain Rs. 1,00,000, Pahnihna Rs. 50,000, Pathumna Rs. 30,000 leh Consolation Prize (Top Ten tling chin) Rs. 7,000 a ni ang.