James Webb Space Telescope: NASA-in 'Jupiter' thlalak thar pholang

NASA chuan James Webb space telescope-in Jupiter thla a lak chu an social media lamah an pholang a, NASA Instagram account lamah hmuh theihin a awm.

An thlalak pholan chu July 27-a lak kha niin Jupiter thlalak tihchhuah tawh hoa ngaihven hlawh ṭhin tak Great Red Spot bakah a Thla (Moon) pahnih hmuh tur a awm tel a, a hualtu (rings) leh ral khata awm galaxy-te pawh hmuh tur a awm. NASA hian Jupiter thlalak hi pahnih lai an pholang a, an thlalak pholan caption-ah chuan infrared light chu mihring hmuh theih a nih loh avangin hmuh theih turin an siam (mapped) thu an tarlang. Citizen scientist Judy Schmidt chuan Webb sensor aṭanga raw data an neih chu hmuh theih turin a khawih danglam tih an tarlang a ni.

James Webb Space Telescope hi nikkum Krismas ni tak khan French Guiana aṭangin Ariane 5 rocket hmangin an kap chhuak a, khawvel aṭanga km maktaduai 1.5 vela hlaah awmin July thla khan Universe thlalak fiah tak mai a rawn thawn let a, ngaihven pawh a hlawh viau nghe nghe a nih kha.