Pokémon hnungzuiin 'Dragon Ball' pakhatna a ni

Kum 23 vel liam taah khan North America Box Office-ah khuan Anime movie 'Pokémon: The First Movie - Mewtwo Strikes Back' chuan tlangzarh karah sum lalut tam ber niin chart topper a ni a, chumi hnuah rorel thei an awm ta meuh lo. Mahse Crunchyroll chuan kar tawp liam ta khan theatre 3,018 laiah 'Dragon Ball Super: Super Hero' an rawn tichhuak a, Box Office-ah sum lalut tam ber a ni nghal- $20,100,000 a lalut. Sum lengvak tam lutuk lohna Box Office-ah 'Dragon Ball Super: Super Hero' aia che ṭha an awm lo a, Rotten Tomatoes lamah rating 7.4/10 lai hmu anime hi khawthlang lama film ngainatute pawhin hmuhnawm an ti tih a chiang.

He film hi Japan lamah chuan June 11 khan tlangzarh a ni tawh a, film review-tute mit pawh a tlung hle. Anime uarna Japan ramah phei chuan an tlangzarh kar tawpah ticket 498,000 lai an hralh a ni.

Pahnihna chu Idris Elba channa film 'Beast' niin kar tawp liam ta chhung khan theatre 3,743-ah chhuah a ni a, $11,575,855 lalutin 'Dragon Ball' a ngam lo hle. Rotten Tomatoes lamah mi 114 review aṭangin he film hian rating 6.1/10 a hmu a, film hmuhnawm pangngai tak a ni tih erawh a chiang.

Pakhatna leh pahnihna bak hi chu film thar top 10-a inhlangkai zo a awm loa, chutihrual erawh chuan film thar dang pathum chart-a lang phak a awm thung. Box Office Mojo chart-a film 50 tarlan zingah Orphan: First Kill (12), The Territory (31) leh Three Minutes: A Lengthening (32)-te chu film thar an ni bawk.

Box Office top 10:-
1 Dragon Ball Super: Super Hero $20,100,000
2 Beast $11,575,855
3 Bullet Train $8,026,717
4 Top Gun: Maverick $5,914,135
5 DC League of Super-Pets $5,683,602
6 Thor: Love and Thunder $4,065,249
7 Minions: The Rise of Gru $3,723,950
8 Nope $3,582,385
9 Where the Crawdads Sing $3,202,683
10 Bodies Bodies Bodies $2,412,208