GIG Motors-in an kum 5 tlin lawm ; YMA Branch panga hnenah ṭanpuina hlan

GIG Motors chuan nimin khan an kum nga tlin lawmna neiin, an kum nga tlin lawmna pual hian YMA Branch panga hnenah ṭanpuina Rs. 25,000 ṭheuh an hlan.

GIG Motors CEO John Lalpeka chuan an sumdawnna awmna hmun veng hrang hrang panga YMA Branch hnenah ṭanpui ngaite ṭanpuina turin heng pawisate hi a hlan a, Chaltlang Branch YMA, Edenthar Branch YMA, ITI Branch YMA, Ṭhuampui Branch YMA leh Chanmari Branch YMA-te hnenah a hlan a ni.

An kum nga tlin lawmna pual hian nimin khan heng veng panga Branch YMA hruaitute leh media mite chu GIG Motors Office, Edentharah thingpui inpuina an nei a, chutah chuan CEO John Lalpeka chuan GIG Motors, Edenthar aṭangin thla tin lirthei 150-200 vel an hralh thu leh, NEXA aṭangin thla tin lirthei 80 vel an hralh ṭhin thu a sawi a, kum nga liam ta chhung khan lirthei 9,000 chuang an hralh tih a sawi bawk.

Mizorama Maruti Suzuki Authorized dealer awmchhun GIG Motors hi August 23, 2017 khan Pu Lal Thanhawla chuan hawngin hma an sawn chak hle a, kum 2021-22 FY-ah phei kha chuan Mizorama an market share chu 75% a tling hial a ni. An hawn aṭanga kumin July thla thleng khan lirthei 9503 an hralh tawh a ni.