Parema A rinchhan Lalpa hnenah a chawl ta

'Ka vui lo Lalpa' album te, 'Ka rinchhan Lalpa' album te, 'Phu loh hmangaihna' album te lo tichhuak tawh Parema hi kum 2013 khan a lei a cancer a ni tih hmuhchhuah a ni a, hmun hrang hrangah enkawl a ni. Cancer natna a neih aṭangin Pathian chu rinchhan tlak a nihzia a hmuh belh a, album pawh a ti­chhuak hial nghe nghe. Hemi hnu hian a ziaawm deuh a, amaherawhchu a natna hian a kiansan tak tak thei lo a, cancer natna avang hian Inrinni chawhnu dar 3:10 khan a nun a thlah a; Pathianni chaw­hnu dar 1 khan a chênna, Khatla Dawrkawn­ah vui a ni ta a ni.

A hun hmasa
Parema, R. Lalremruata hi R. Thansanga leh Lalrintluangi te fa pahnihna a ni a, kum 1969 April 6 khan Haflong, Assam-ah a piang a, unau pianpui pathum a nei. Kum 1993 May 18 khan Rozikpuii nen Khatla Kohhranah an innei a, fanu pathum - R. Vanlalmalsawmi, R. Lalrinzuali leh R. Vanlalhmangaihi te an nei. A fate zinga mi R. Vanlalmalsawmi hi Mizorama band lar, The Chosen-a an keyboardist kha a ni a, a nau, R. Lalrinzuali pawh hi a zaithiam a, music video a siam tawh nghe nghe.

A naupanlai hun hi Haflong-ah a awm a, class II a zir thlengin Haflong-ah hian school a kal a, hei vang hian ṭawng dang pawh a thiam nual phah a, chu chuan tun hnu zela a rawngbawlnaah nasa tak a pui. A album hnuhnung ber 'Ka vui lo Lalpa'-ah pawh khan ama hla phuah ngei, Hindi-a a phuah chu a dah tel nghe nghe a nih kha. Haflong bakah hian Aizawl, Shillong, Kotagiri leh Anantapur-ah te lehkha zirin, Anantapur aṭang hian B.Tech (Mechanical) a zo.

Rimawi khawvela a hnuhma
Hla ṭhahnem tak a phuah tawh a, Mizo hla mai bakah Hindi leh English-in hla a phuah nual. A hla phuah zingah 'Phu loh hmangaih­na' tih chu kum 2010 KṬP Ge­neral Conference Hla Buah khan a

chuang a, Mizoram pum huapa sak hlawh pawl tak a ni. He Hla Buah vêk hian 'Thup hlen theih loh' a hla phuah chu a awm bawk. A hla phuah tawhte hi album-a siamin a tichhuak ṭhin. Album a tihchhuah hmasak ber chu kum 2009-a mi 'Phu loh hmangaihna' kha a ni. Kum 2011 khan English hla dahna 'Thank You Grandpa' album a ti­chhuak. Cancer natna a neih hnuah nasa lehzualin Pathian pawlna a chang a, Pathianin hla ṭha tak tak a pêkte chu album-a siamin, a hunlaia zaithiam lar ber berten an sa a, a album hming hi 'Ka Rinchhan Lalpa' tih a ni a, he album-ah hian a testimony ropui tak chu a zep tel nghe nghe. He album hi kum 2014-a a tihchhuah a ni.

Nikum, kum 2016 khan eng ang harsatna nasain tlakbuak mah se, Pathian chunga a vui lohzia tarlanna album 'Ka vui lo Lalpa' tih chu a tichhuak leh a, he album hi a album tihchhuah hnuhnung ber a ni ta. A natna avanga enkawl lai a ni bawk nen, album a buaipui hun chhung pawh a rei hle. He album hi a hlawhtling hle a, he album-a hla 'Ka vui lo Lalpa', 'A vul zel', 'Nang chauh i ni', 'I hming chauh', leh 'Min chhung khat leh ṭhin' tihte chu Zonet Ṭhazual Fakna chart-ah nikum leh kumin chhungin pa­khatna an luah thei hial.

Parema hian cancer natna a vei hnu hian a natna ang nei midang­te a veiin, ṭanpuina kawngah a thawhhlawk hle. 'Ka rinchhan Lalpa' leh 'Ka vui lo Lalpa' album te pawh cancer natna veite puala a siam a ni ber. Heng album a hralhna aṭanga hlawkna a hmuhte hi cancer natna vei, ṭanpui ngaite ṭanpui nan a pe vek a ni.