Jay-Z ‘4:44’ a la kal zel
US lamah chuan Jay-Z album thar lo chu thil dang a la awm thei vak lo a ni ber. 4:44 album hi kar liam ta chhunga US-a album hralh hnem ber a ni leh a, mahse a tlahniam ve viau tawh a, nuai khat a tlin tawh lo.
Jay-Z album thar 4:44 hi kar liam ta chhung khan copy 87,000 lai hralh belh leh a ni a, a hma khan nuai hnih chuang hralh a ni. Hralh zat tlahniam viau mah se, he album aia hralh hnem a la awm chuang lo. A hralh aṭanga copy 61,000 hi album pangngai a ni a, a bak chu album tlukpui a ni.
Jay-Z tan chuan pakhatna a luah leh hi a kawng hrang hranga hlawhtlinna tizualtu a ni. Album a tihchhuah tawhte hmanga Billboard 200 chart-a pakhatna a luah vawi 25-na a ni a, Eminem hnungah a awm. Eminem hian Billboard 200 chart-ah vawi 35 zet pakhatna a lo luah tawh a, Eminem tluk tur chuan Jay-Z hi a la ṭan deuh hle chu a ngai.
Kendrick Lamar-a album ‘DAMN’ hi a tlahniam hlei thei lo, kar liam ta chhung pawh khan copy 56,000 lai hralhin pahnihna a la luah thei cheu. ‘DAMN’ album hi a tihchhuah aṭanga chawlhkar 14-na a ni tawh a, top 5 hnuai lamah a la tlahniam lo hrim hrim. French Montana album thar ‘Jungle Rulse’ chu pathumnaah a rawn lang thei a, kar liam ta khan copy 52,000 a hralh.
Billboard 200 chart
“4:44” - Jay-Z (87,000)
“DAMN” - Kendrick Lamar (56,000)
“Jungle Rules” - French Montana (52,000)
“Grateful” - DJ Khaled (43,000)
“Issa Album” - 21 Savage (40,000)
“Divide (division sign)” - Ed Sheeran (34,000)
“Evolve” - Imagine Dragons (33,000)
“Moana” Soundtrack - Various Artists (28,000)
“American Teen” - Khalid (28,000)
“24K Magic - Bruno Mars (28,000)