MJ-a’n thih hnuah USD mtd 18 a lalut tawh

Michael Jackson hi thi tawh mah se, a hminga sum lakluh erawh a la awm zel a, kum 2009-a a thih aṭang khan royalty aṭang chauhin USD mtd 18 zet a lalut tawh.

Sum heti zat a lakluh thu hi court-ah puan chhuah a ni. Court-ah hian Jackson-a estate leh Quincy Jones te chuan contract bawhchhiat chungchangah thubuai an la nei reng a, court hmaah hian Michael Jackson-a’n royalty aṭanga sum a hmuh zat hi tarlan a ni. Quincy Jones hian Jackson Estate chu court-ah khingin, USD mtd 30 an ba niin a sawi a, a chhan ber chu Jackson-a album Bad, Thriller, Off the Wall leh This Is It-a contract an bawhchhiat vang niin a sawi.

Jones hian kum 2003 daih tawh khan estate hi a lo khing tawh a, hemi ṭum hian ‘Billie jean, ‘Thriller’ leh ‘Don’t stop ‘til you get enough’ te chu producer fee leh royalty a hnena an pek loh nan an remix daih niin a sawi a ni.