‘Despacito’-in ‘Shape of You’ a ûm pha ṭêp

Billboard single chart, Billboard Hot 100-ah chuan Despacito hla, Luis Fonsi leh Daddy Yankee te sak, a hnua Justin Bieber-a te nen an remix leh hi chawlhkar 11-na atan pakhatna a luah leh. Ed Sheeran-a hla hit ‘Shape of You’ a ûm pha teuh tawh hle.

‘Despacito’ hla hi chawlhkar 11 chhung zet Billboard Hot 100-ah pakhatna a luah a, Ed Sheeran-a hla ‘Shape of You’ hnua a zawna pakhatna luah rei ber a ni a, amah­erawhchu ‘Shape of You’ hla hi a la tluk chiah lo. ‘Shape of You’ hi Billboard 100-ah hian a zawnin vawi 12 lai pakhatna a luah a ni.

Billboard Hot 100 chart hi kum 1958 aṭanga siam kha a ni a, hemi hnu aṭang hian chawlhkar 11 chhung pakhatna luah thei hla hi 23 chauh a la awm. A pumpuiah chuan Mariah Carey leh Boyz II Men te hla ‘One Sweet Day’ kha eng hla mahin an la tluk thei lo a, he hla hi kum 1995-96 chhung khan chawlhkar 16 chhung lai mai pakhatna a luah a ni.

Digital Song Sales chart lamah pawh ‘Despacito’ bawk download hlawh ber a la ni a, chawlhkar 12 chhung chu download hlawh ber a ni ta. Kar liam ta chhung khan vawi 118,000 lai download a ni a, a hma kar aiin 6%-in download hi a tlahniam tawh zawk. The Chainsmokers hla ‘Closer’, Mark Ronson leh Bruno Mars te hla ‘Uptown Funk’, leh Flo Rida leh T-Pain te hla ‘Low’ te kha a ûm pha ṭep tawh a, heng hlate hi chawlhkar 13 chhung Digital Song Sales chart-ah pakhatna an luah.

Streaming Songs chart-ah pawh ‘Despacito’ hi a kal lai a la ni. Kar liam ta chhung khan he hla hi US-ah vawi maktaduai 57.6 zet stream a ni.