Bieber a chauh lutuk avangin a tour a cancel
Justin Bieber chu a taksa a chauh lutuk avangin ‘Purpose tour’ a neih hmabak pawh a chhunzawm thei dawn lo a, concert hmabak a neih pawh a ṭhulh. Hemi chungchangah hian John Mayer chuan Justin Bieber a thlawp hle.
Justin Bieber-a official website-ah, “Hmuhlawk leh beisei lawk loh thil avangin Purpose World Tour concerts a neih hmabakte chu a cancel a ngai dawn ta. Justin-a hian a fan-te a ngaina em em a, tihlungnihloh a duh lo a ni. Thla 18 kalta chhunga tour a neihahte a fan-te avanga tawnhriat a neih zawng zawngah a lawm em em a ni,” a ti.
‘Purpose’ tour-ah hian Justin-a hian show 14 lai mai hmabak a la nei a, a tam ber hi North America-ah a ni a, hei bakah hian Japan, Philippines, Hong Kong leh Singapore te pawh a tel.
Tour hmabak cancel thuah John Mayer chuan Bieber hi a thlawpin a hrethiam hle a, “Miin a tour neih tur hmabak a cancel a nih chuan, tilui ta se a taksa tana chhiat lehzualna tur a thleng dawn tihna a ni,” a ti.