Linkin Park record-ten hralh a kal thar

Chester Bennington thihna chu tuarin, ui hle mah se, Linkin Park album leh an hlaten hralh a kal phah nasa hle.

Linkin Park album thar ber, ‘One More Light’ chu Billboard 200 chart-ah 17-naah a rawn kai thar leh a, he album hi copy 23,000 lai an hralh a, chung zinga 18,000 chu album pangngai a ni. Chester-a hoa album an tihchhuah hmasak ber ‘Hybrid Theory’ kha 27-naah a rawn lang a, copy 15,000 an hralh.

Kum 2003-a album an tih­chhuah ‘Meteora’ chu Billboard 200 chart-ah rawn lang thar lehin, 41-na a luah a, kum 2007-a mi ‘Minutes to Midnight’ album chu 115-naah a lang. Rock Album chart lamah phei chuan an dinhmun a ṭhat phah hle. One More Light chu pahnihnaah a kai chho a, Hybrid Theory kha Rock Album Chart-ah pangana niin, Meteora chu parukna a ni a, Minutes to Midnight chu pasarihna a ni.

Hla malah chuan ‘In The End’ kha streaming-ah 923,000 lai stream a ni a, ‘Numb’ chu vawi 740,000 leh Heavy kha vawi 684,000 stream a ni.