Mizo Idol ; Zanin aṭangin Top 20 intihsiak ; Mipui vote theihna siam tawh dawn

Mizo Idol season 7 intihsiaknaah mi 20 chiah intihsiak tur an awm ta. Chung mi 20 aṭanga 10 chu zanin hian an zai anga, naktuk zan lamah midang 10 an zai leh ang.

Top 20 intihsiknaah hian music track hman theih a ni tawh dawn a, Music Home, Zonuamah bawk intihsiakna an nei leh dawn a ni. Zonet Zawlbuk leh Zonet Empai-ah dar 8 aṭangin LIVE a ni dawn a, zanin aṭang hi chuan Empai-ah hian duh duh tan a en theih tawh dawn lo a, subscriber-te chauhin an en thei dawn a ni.

Zaithiam 400 rual fuankhawm aṭanga thlirfim mi 20 chiah an awm tawh a, boruak a sang lo thei lo. 1st Round aṭangin social media lam thlir phei chuan mipui lamin kan idol ṭheuh tur kan thlang der tawh niin a lang a, tling zo ta lo, hmabak nei eng tak tak pawh an tam. An zai thiam tawh hlawm bawk a, hla thlang thiam leh judge-te lung tiawi thiam apiang tan chance a ṭha tawh dawn tih a chiang.

Zan khata zai tur an tlem tawh dawn bawka, judge-te pawhin hun ren lo zawkin contestant-te zai an 'comment' theih tawh a rinawm a, an ṭawngkam leh intihsiakna beitute zai chungchanga an ngaihdan pawh a ngaihnawm sawt viauin a rinawm a, chu chu show tihlu chho zeltu tur pawh a ni ngei ang.

Mipuiin chanvo kan nei dawn
Endiktute mai bakah mipui lam pawhin chanvo kan nei ve dawn a, kan ṭan zawng kan vote thei dawn. Mipui vote theihna siam a ni dawn a, round tawpah hun hawn a ni ang.