Zaninah Lalsangzuali Sailo pualin hun hman a ni dawn

DD Mizoram chuan zanin dar 7:00 hian Mizo zaithiam lar Lalsangzuali Sailo pualin Zo Awi Zun Zam Programme-ah hun an hmang dawn a, darkar hnih a awh ang. Zonun Band, Israel-a, K. Lalthlamuankimi, R. Lalbiaksanga leh Chatlang Branch YMA te an zai ang.

Lalsangzuali Sailo hi Mizo nu belhchian dawl tak a ni a; thu leh hla thiam, thu sawi thiam, lehkha thiam, kohhran leh khawtlanga inhmang tak niin a samsei vangin Mizo khawvelah chuan hriat a hlawh viau bawk.

Thingsai khua Mizoramah May 15, 1949 khan Lalsangzuali hi S. Vanchhuma leh Sapthangi Chawngthu te fa 11 zinga upa ber a ni a; October 14, 2006 khan ‘aneurysm’ natna avangin a thi. Mizo nu langsar a nih phak miau avangin a vuina programme pawh hi local TV te chuan kimchangin an pe chhuak hial.

Lalsangzuali hi All India Radio 'A' Grade Artist a ni a, hla 450 chuang a record. A hlaphuah ṭhenkhat chu Mizoram Class IV aṭanga Class XII thlengin zirlaibu-ah telha zir a ni.

Zanin hian DD Mizoram (TV leh YouTube) kaltlangin Lalsangzuali Sailo hla larte sak a ni dawn a, amah ngainatute tan chuan hmaih phal chi a ni dawn lo. "Ngaih lai a zual ṭhin e; ṭahlai ka bang thei love," tih a ṭul leh dawn. He programme hi DDK Aizawl, Delta Sound leh Zonun Band te ṭangtlanga an buatsaih a ni.