Dugong: Mermaid thawnthu 'inspire' tu nia sawi China-ah a mang

Zirmite chuan 'manatee' nena inzawmna nei tuia cheng ramsa dugong chu China-ah a mang tawh tih an puang.

Dugong hi hmasang mermaid thawnthu 'inspire'-tu nia sawi niin kum nga liam ta chhung khan China tuipui kam velah mi pathum chiahin an hmu tawh a, tunah phei chuan a mang tawh tih an puang hial a ni.

Heng ramsate hi zaidam tak leh che rang lem lo tak an ni a, khawvel hmundangah tlemte la awmin China ang tho hian mang mai thei dinhmunah an ding mek niin BBC chuan a tarlang.

Hemi chungchanga zirchianna neitu Zoological Society of London (ZSL) mi Prof Samuel Turvey chuan China-a dugong hmuh tur awm ta lo chu channa nasa tak a nih thu sawiin an zirchianna aṭanga a lan dan chuan kum 2000 hnulamah phei kha chuan scientist zingah hmu an awm tawh lo hial a ni. Tuipui kama cheng mi 788 lai chu kawm lehin hmu an awm leh awm loh an zawt a, kum 23 chhung tehmeuh hmu tawh lo an nih tlangpui laiin kum nga kal ta chhung khan mi pathum chauhin an hmu tih an sawi thung.