Kendrick-a kal lai a tawp lo
MTV chuan Video Music Awards an sem turah nomination list an tar chhuak a, Kendrick Lamar chu mimala lang hnem ber a ni a, category pariatah lai a lang a, a lanna chhan ber chu ‘Humble’ video hlawhtlinna kha a ni. ‘Humble’ video avang hian category pasarihah ngawt a hming a lang a, Video of the Year, Best Hip-Hop, Best Cinematography leh Best Direction te a tel. Hei bakah hian Best Art Direction, Best Visual Effects leh Best Choreography te chu Humble hmanga a lanna a ni. Artist of the Year-ah a hming a lang bawk.
Katy Perry leh The Weeknd te chu Kendrick dawta lang hnem an ni a, category pangaah ve ve an lang. Katy Perry hi a hla hrang hrang a lang a, chung zingah chuan ‘Chained the rhythm’, ‘Bon Apetit’, leh Calvin Harris nena an siam ‘Feels’ te pawh a tel. The Weeknd hian ‘Reminder’ a hlawhtlinpui thung.
Kumin hian MTV VMA-ah thil danglam kan hmu a, chu chu mipa leh hmeichhe category hran a awm ta lo hi a ni. Nikum lam kha chuan Best Female Video te, Best Male Video te a awm ṭhin a, kuminah chuan hengte hi paihin, mipa leh hmeichhia te chu category khatah an inel ho.
MTV VMA-ah hian fan-ten an duhzawng an vote thei a, vote hun hi hawn a ni tawh. Best Song of Summer category siam a ni a, heta nominee-te hi karleh khian puan chhuah a ni ang. MTV VMA hi August 27 khian Inglewood, California-a The Forus-ah sem a ni ang.